«Налмэсымрэ» «Ислъамыемрэ» Москва щыIэх
Москва дэт хьакIэщэу «Космосым» иконцерт зал Адыгеим лъэпкъ къашъомкIэ и Къэралыгъо академическэ ансамблэу «Налмэсымрэ» Адыгеим лъэпкъ орэдымкIэ и Къэралыгъо ансамблэу «Ислъамыемрэ» къызэдатыщт концертэу «Сиреспубликэ инэф кIосэщтэп» зыфиIорэр мэлылъфэгъум и 3-м щыкIощт. Адыгэ Республикэм иминистрэхэм я Кабинетрэ Москва и Правительствэрэ сатыу-экономикэ, научнэ-техникэ ыкIи культурнэ зэдэпсэуныгъэм фэгъэхьыгъэ Зэзэгъыныгъэу зэдашIыгъэм тетэу концертыр кIощт. Адыгэ Республикэм и Президентэу ТхьакIущынэ Аслъан, Адыгэ Республикэм илIыкIохэм яIофшIапIэу Урысые Федерацием и Президент дэжь ренэу щыIэр, Москва и Темыр-КъокIыпIэ административнэ кой и Алексеевскэ район и ГъэIорышIапIэ а IофтхьабзэмкIэ IэпыIэгъу къафэхъугъэх. Адыгеим культурэр къэухъумэгъэным ыкIи хэхъоныгъэ ащ егъэшIыгъэным мэхьанэшхо щыраты. АР-м и Президентэу ТхьакIущынэ Аслъан творчествэм епхыгъэ ублэпIэ пстэуми ишIуагъэ арегъэкIы, мы концертми джыри зэ ар къегъэшъыпкъэжьы. Адыгеим иартист цIэрыIохэу зиIэпэIэсэныгъэкIэ дунаим ихэгъэгубэмэ ащашIэхэрэм концертхэр шъхьаф-шъхьафэу къатых, ау мы проектым ахэр щызэзыпхыгъэхэр Москва дэс цIыфхэм аIукIэнхэм игупшысэ шIагъу ары. Концертым ыцIэ - «Сиреспубликэ инэф кIосэщтэп» - мэхьэнэ гъэнэфагъэ иI. Тихэгъэгу ичIыпIэ мамырэу Адыгэ РеспубликэкIэ заджэхэрэр илъэсым исыд фэдэ уахъти дахэу щыт, зэIукIэгъухэм, творчествэм, гъэпсын IофшIэным, ублэпIэ нэфхэм ар афызэIухыгъ. Адыгэхэм япсэупIэ зэ нэмыIэми зылъэгъурэм егъэшIэрэу ар ыгу къенэ. Европэм щыщ цIыф къэкIухьэкIо цIэрыIохэу Интериано, Тавернье, Главани, Тебу де Мариньи ыкIи нэмыкIхэм ренэу агъэшIагъоу зигугъу къашIыщтыгъэхэр адыгэхэм шэн-хабзэу ахэлъхэр, якультур ары. Адыгэхэм яIофшIэгъэ анахь дэгъухэр концертым щызэгъэуIугъэх: ижъырэ лъэпкъ орэдхэр ыкIи авторхэм якомпозициехэр, ижъырэ къашъохэр ыкIи Адыгеим итворческэ коллектив пэрытхэм яджырэ хореографие. Концертым иторжественнэ къызэIухын хэлэжьэщтых Адыгэ Республикэм и Премьер-министрэу КъумпIыл Муратэрэ Москва и Темыр-КъокIыпIэ кой и Алексеевскэ район и ГъэIорышIапIэ ипащэу Мария Феневамрэ. Джащ фэдэу мы Iофтхьабзэм хэлэжьэщтых Адыгэ Республикэм и Официальнэ лIыкIоу Урысые Федерацием и Президент дэжь ренэу щыIэ Хъопсэрыкъо Мурат, Адыгэ Республикэм культурэмкIэ иминистрэу Лъэцэр Адам, ансамблэ цIэрыIохэу «Ислъамыемрэ» «Налмэсымрэ» япащэхэр: УФ-м инароднэ артистэу, УФ-м искусствэхэмкIэ изаслуженнэ IофышIэшхоу Нэхэе Аслъан, УФ-м изаслуженнэ артистхэу, АР-м инароднэ артистхэу Къулэ Мыхьамэдрэ Бэстэ Азмэтрэ. Адыгэ макъ от 03.04.2009
| 
